Sumarhús í Kjarnaskógi
Félagið hefur nú fengið afhent sumarhús sem stendur við Götu Sólarinnar nr. 11 í Kjarnaskógi við Akureyri. Verið er að standsetja húsið og gera klárt til leigu. Frekari upplýsingar um leigutilhögun og verð koma inn á vefinn fljótlega.
Hér er lýsing fasteignasölunnar ásamt mynd af sambærilegu húsi:
Frábær staðsetning við vinsælar útivistarperlur Eyjafjarðar en aðeins um 4 km fjarlægð frá miðbæ Akureyrar. Framkvæmdum við götuna lauk á árinu 2016. 5 hús eru fullbyggð. 11 hús verða byggð í heildina og mun framvæmdum ljúka 2018. Um er að ræða annan áfanga orlofshúsakjarnans, en fyrir eru 22 orlofshús sem flest eru í eigu fyrirtækja eða starfsmannafélaga. Þar á meðal eru; HS orka, Tryggingamiðstöðin, Marel, Eimskip, Félag Íslenskra Atvinnuflugmanna og Landbankinn. Kjarnaskógur er í suðurhluta bæjarlands Akureyrar u.þ.b. 4 km frá miðbænum. Kjarnaskógur er náttúruperla sem hefur um langt árabil notið þrotlausrar aðhlynningar skógræktarmanna og eru þar frábærar göngu- og hlaupaleiðir. Í skóginum eru upplýstar göngubrautir, blakvöllur, leiktæki, líkamsræktartæki og sérhönnuð fjallahjólabraut svo dæmi séu nefnd. Á veturna er troðin braut fyrir skíðagöngufólk. Einnig er mjög fallegt og skemmtilegt útivistarsvæði ofan Kjarnaskógar en það er útilífssvæðið við Hamra. Góð gönguleið er þangað úr Kjarnaskógi.
Stutt er í Hlíðarfjall sem er frábært skíðasvæði og líklega það vinsælasta á landinu. Golfvellir eru stutt frá. Jaðarsvöllur – 18 holur, Leifsstaðir – 9 holur og Þverá – 18 holur.
Nálægðin við miðbæ Akureyrar gerir það að verkum að allir geta hæglega notið allrar þjónustu og afþreyingu sem bærinn og nágrenni hefur upp á að bjóða. Hvort heldur sem er að sumri eða vetri.
Húsin eru sérstaklega hönnuð með íslenskar aðstæður í huga. Klæðning útveggja er harðviður og einangrun sérstaklega góð til að halda upphitunarkostnaði í lágmarki. Húsunum verður skilað fullbúnum að utan sem innan þ.m.t. tæki í eldhúsi og heitum potti á verönd.
- Created on .